Psalms 140

Kuomba Ulinzi Wa Mungu

(Kwa Mwimbishaji: Zaburi Ya Daudi)

1 ^aEe Bwana, niokoe, kutoka kwa watu waovu;
nilinde na watu wenye jeuri,

2 ^bambao hupanga mipango mibaya mioyoni mwao,
na kuchochea vita siku zote.

3 ^cWao hufanya ndimi zao kali kama za nyoka,
sumu ya nyoka iko midomoni mwao.

4 ^dEe Bwana, niepushe na mikono ya waovu;
nilinde na watu wenye jeuri
wanaopanga kunikwaza miguu yangu.

5 ^eWenye kiburi wameficha mtego wa kuninasa,
wametandaza kamba za wavu wao,
wametega mitego kwenye njia yangu.

6 ^fEe Bwana, ninakuambia, “Wewe ni Mungu wangu.”
Ee Bwana, usikie kilio changu na kunihurumia.

7 Ee Bwana Mwenyezi, Mwokozi wangu mwenye nguvu,
unikingaye kichwa changu siku ya vita:

8 ^gEe Bwana, usiwape waovu matakwa yao,
usiache mipango yao ikafanikiwa,
wasije wakajisifu.

9 ^hVichwa vya wanaonizunguka vifunikwe
na shida zinazosababishwa na midomo yao.

10 ⁱMakaa ya mawe ya moto na yawaangukie!
Na watupwe motoni,
katika mashimo ya matope,
wasiinuke tena kamwe.

11 ^jWasingiziaji wasifanikiwe katika nchi;
maafa na yawawinde watu wenye jeuri.

12 ^kNajua kwamba Bwana huwapatia maskini haki,
na kuitegemeza njia ya mhitaji.

13 ^lHakika wenye haki watalisifu jina lako,
na waadilifu wataishi mbele zako.